إلى الأستاذ عبد الرحمن الأبنودي
أضيف بواسطة كرم أبوسحلي, في 26-12-2008 15:06
عايز عنوان؟
"لا تصالح "
مَصَلِحتش حد
ولسة يا خال الكلمة ف ودنى ترن
وكل منام تصرخ فى وداني
أقوم مفزوع
ألاقي الجرح يئن
أفتح شباكي ألاقي الناس ماشيين
على فين رايحين ؟
منيش عارف
ولا هما كمان عارفين
لو فيهم حد رافع راسه
كنت سألته بس مطاطيين
قلت أسمع صوتهم أهو يمكن
أعرف منهم
على فين رايحين
ومنين جايين
لكن ساكتين.
أما غريبة!
دحنا يوماتي نرطن بكلام
ونعيد فى كلام ونزيد فى كلام
قلت خلاص ، اللبس بتاعهم
حيقوللي إيه الأخبار
لو كانت الجزمة برقبة طويلة
وفوقيها "بوريه"
يبقى محاربين
وتكون الفرحة بجد يا خال
ولو كانت الجزمة على قد الحال
وعلى الراس مربوط منديل
يبقى مزارعين
وندوق القمح بتاعنا يا خال
أصل القمح إياه فاسد
طب محنا كمان فاسدين!
بس يا خالي:
مَكَنوش لابسين
مكنوش لابسين!!
عايز عنوان؟
يبقى أنت أكيد تايه
زى التنيين
إيه فايدة العنوان
إن كنت مش ساكن
ولا هما كمان ساكنين!!
منقووووووووووووول
موضوع: شعر كرم ابو سحلى 
السبت يناير 03, 2009 1:53 am